ایسی چَلی ہوا ، کہ چَراغاں نہیں رہا

 وحشت تھی وہ ، کہ اپنا گَریبَاں نہیں رہا 

ایسی چَلی ہوا ، کہ چَراغاں نہیں رہا 

تُجھ کو بُھلا دُوں ، ایسا کچھ اِمکان تو نہیں 

پر دِل میں تیری یَاد کا ارمَاں نہیں رہا

خُوشِیاں سَمیٹنے کا جُنوں لایا دَار پر

حَسرت تو رہ گئی ہے سو ، دَاماں نہیں رہا 

وہ آندھیَاں چلِیں ہیں کہ سب کچھ بِکھر گیا 

زِندَان والے رہ گئے زِندَاں نہیں رہا 

اِتنے فَریب کھائے ہیں اِن پَارسَاؤں سے 

سِینے میں میرے اب کوئی اَرماں نہیں رہا 

ہر بار گَردِشوں کی نَظر مُجھ پہ ہی پَڑی  

حَیراں ہوا ہوں یُوں ، کہ میں حَیراں نہیں رہا

گَر کچھ کَرم کِیے ، تو سِتم اِس سے بھی سِوا 

دُنیا کا مُجھ پہ اب کوئی احسَاں نہیں رہا 

گو چِھن گئی قَبا ، مری دَستار بھی گئی

رَب کا کَرم رہا کہ میں عُریاں نہیں رہا 

اُس کی نظر ، کہ رُوح کو سَیراب کر گئی 

شاہد کے دِل میں اب کوئی طُوفاں نہیں رہا

شاہد مرزا